Înstîtuta Ziman û Perwerdeya Kurdî Li Danmarkê [Înstîtuta Kurdî-dk] li Københavnê resepsiyonek da

Înstîtuta Ziman û Perwerdeya Kurdî Li Danmarkê [Înstîtuta Kurdî-dk], li 12ê Gulanê [2012] roja şembîyê bi munasebeta damezrîna înstîtutê, dana sertîfîkatên kursîstên kursa Kurdî û pîrozbahîya Cejna Zimanê Kurdî resepsiyonek da. Ji Kurd û Danmarkîyan mêhvan beşdar bûn. Resepsiyon li Københavnê [Nørrebro] li salona Verdens Kultur Centerê çêbû.

Resepsiyonê bi axivtina Rêvebirê Giştî yê Înstîtuta Ziman û Perwerdeya Kurdî Li Danmarkê [Înstîtuita Kurdî-dk] Rojan Hazim ve dest pê kir. Di dîwana rêvebirina resepsiyonê da endamên heyeta îdarî ya Înstîtuta Kurdî-dk Baban Seqizî û Halîl [Xelîl] Küçülyildiz hebûn. Ji endamên heyeta îdarî ya Înstîtuta Kurdî-dk Hetav Rojan, Dilêr Zaxoyî, Şengul Deniz jî amade bûn û mêhvan pêşwazî kirin.

Ji Parisê mamostayê Kurdolojîyê li Unîversîteya Inalcoyê [Sorbon] Doç. Dr. Ibrahîm Seydo Aydogan, ji Berlînê serokê Înstîtuta Ziman û Çandê ya Kirmancî [Zaza] Lerzan Jandîl, nivîskar û zimanzan Huseyin Kartal, endamê rêvebirîya Înstîtuta Kurdî ya Stockholmê Şoreş Reşî ji bo piştevanîya damezrîna Înstîtuta Kurdî-dk hatin û beşdarî resepsiyonê bûn û li ser giringîya ziman û perwerdeya Kurdî axivtin kirin, damezrîna Înstîtuta Kurdî-dk pîroz kirin û desteka xwe diyar kirin.

Di resepsiyonê da endamê Meclisa Şehridarîya Københavnê Lars A. Rasmussen û serokê Dansk Kurdisk Kultur Centerê Fatîh Baran jî axivtin.

Komisyona Ziman û Perwerdeyê ya KNKê, Fey-Kurd û Fokus-Ayê jî piştevanîya resepsiyonê kirin. Di resepsiyonê da sertîfîkatên kursîstên kursa Kurdî hatin dan.

Ji bilî kursîst, endamên Înstîtutê û guhdaran berpirsiyarên PDK, YNK, Partîya Zehmetkêşên Kurdistanê û Partîya Komûnîst ya Kurdistanê yên Danmarkê jî amade bûn, mesajên xwe dan û axivtin kirin. Herweha mamosta û zimanzanê Danmarkî René Mark Nielsen jî di resepsiyonê da amade bû û avabûna Înstîtuta Kurdî-dk pîroz kir.

Ataşeya Kulturê ya Sefareta Komara Iraqa Federal xanima hêja Rêzan S. Hamawi jî bi bûketeke kulîlkan ve hate resepsiyonê û Înstîtuta Kurdî-dk pîroz kir.

Di resepsiyonê da herweha Cejna Zimanê Kurdî [14-15-16ê Gulanê] hate pîroz kirin.

Resepsiyon bi beşdarîya nêzîkî 100 [sed] kesan, bi coş û germîyeke bilind bi dawî bû.

Di dawîya resepsiyonê da seremonîya dana sertîfîkatan hate kirin. 17 kursîstên zimanê Kurdî sertîfîkatên Înstîtuta Kurdî-dk ji destê van kesan wergirtin:

ROJAN HAZIM [Bo Metin Kara]

Dr. IBRAHIM SEYDO AYDOGAN [Bo Necla Baran & Ceylan Taşkin]

LERZAN JANDÎL [Bo Rebenî Cêlikan & Akif Dul]

HUSEYIN KARTAL [Bo Fexrî Akin & Esmer Mamedî]

ŞOREŞ REŞÎ [Bo Sinem Öztopçu & Fatih Ciwan]

BABAN SEQIZÎ [Bo Ronahi Bulut]

XELÎL KÜÇÜKYILDIZ [Bo Xalid Sert]

LARS ASLAN [Bo Besê Olgun]

SERDAL BENLI [Bo Firat Taş & Hasan Destxurt]

FATIH BARAN [Bo Özgür Azad Polat]

ŞOREŞ BILIKAN [Bo Mîdya Akreyî]

YUSUF REŞÎD [Bo Burhan Hemo Baran]

17 kursîstên ku piştî şeş [6] meh kursa zimanê Kurdî sertîfîkat wergirtî ev bûn:

Grûba I.: Sertîfîkatên mamostatîyê

Metîn Kara

Necla Baran

Grûb II.: Sertîfîkatên pêcûneya destpêkê

Asmar Mamadi [Esmer Mamedî]

Ayhan Dugan [Rebenî Cêlikan]

Burhan [Hemo] Bo Baran

Ceylan Taşkin

Esma [Besê] Olgun

Fahrî Akin

Fatih Şener [Ciwan]

Firat Taş

Halit [Xalid] Sert

Hasan Gürel [Destxurt]

  1. Akif Dul

Midia Tayyeb [Mîdya Akreyî]

Özgür [Azad] Polat

Ronahî Bulut

Sînem Öztopçu

**

 

Axivtina Rêvebirê Giştî yê Înstîtuta Ziman û Perwerdeya Kurdî Li Danmarkê [Înstîtuta Kurdî-dk] ROJAN HAZIM

Mêhvanên ezîz,

Hevalên hêja,

Kursîstên delal,

Hûn hemû bi xêr hatine resepsiyona pîrozbahîyê ya damezrîna Înstîtuta Kurdî-dk, Cejna Zimanê Kurdî û seremonîya dana sertîfîkatên kursa Kurdî. Bila Cejna Zimanê Kurdî li we hemûyan pîroz be.

Înstîtuta Ziman û Perwerdeya Kurdî li 29ê Sibata îsal [2012] hate damezrandin. Înstîtuta Kurdî-dk, ji ber hewcehîya nufûsa Kurd ya li Danmarkê hate ava kirin. Nufûsa Kurd îro nêzîkî 30 [sih] hizaran e, lê belê ev hejmare her bo her zêde dibe û dê hêj jî bibe. Ji dawîya salên 1960an were heta îro bi vê hejmarê ve kolonîyeke Kurd li Danmarkê pêkhatîye. Kurd, wekî parçeyekî civata Danmarkê her bi çi rengî be jîyana xwe di hemû bask û waran da didomînin. Kurd di nav vê çerxa jîyanê da dixwazin bi etnîk orîjîna xwe ve bijîn û eve mafê wan yê xwezayî, meşrû û huqûqî ye. Di vê ekuasyonê da xala sereke ya parastina orîjîna etnîk bi axivtin, kar înan û perwerdeya makzimanî mumkun dibe. Kurd daku di nav civata Danmarkê da xwe biparêzin û bi cudahîya etnîk orîjîna xwe ve bijîn divêt ji alîyê makzimanî ve asîmîle nebin. Rêya vê jî bi wergirtina perwerdeya makzimanî dibe.

Kurd li Danmarkê parçeyekî civatê ne û xerc û bideha xwe didine dewletê. Mafê wan jî heye ku bi destek û hevkarîya dewletê perwerdeya bi makzimanê xwe jî bibînin. Bi cih înana vê daxwaza meşrû ya Kurdan dewleta Danmarkê erkdar e. Înstîtuta Kurdî-dk daxwazê ji dewleta Danmarkê dike ku vê daxwaza Kurdan di çarçoveya perwerdeya oblîgatorîyê da qebûl bike û bi cih bîne.

Ji bo parastina nifşên nû yên Kurd li Danmarkê karê sereke perwerdeya zimanê Kurdî ye. Înstîtuta Ziman û Perwerdeya Kurdî Li Danmarkê ji bo vê armancê hatîye damezrandin ku plan û projeyên sîstematîk yên ziman û perwerdeya Kurdî amade bike û pêşkêşî dem û dezgehên dewletê bike û bi hevkarîya mekanîzmayên dewletê realîze bike.

Înstîtuta Ziman û Perwerdeya Kurdî Li Danmarkê daxwazê ji Kurdan jî dike ku xemsarîya di warê zimanê Kurdî da terk bikin û di malê da, di têkilîyên navxweyî da makzimanê xwe Kurdî bi kar bînin. Kurdê ku makzimanê xwe bi kar neyîne, xwe, xwe bi xwe asîmîle dike ku eve otoasîmîlasyon e û beramberî zimanê xwe, paşeroja nifşên xwe gunehkarîyeke mezin e.

Parastin û mayînde kirina “etnîk orîjîn”a Kurdî ya ji hemû alîyan ve bi axivtin, kar înan û perwerdeya Kurdî dibe.

Înstîtuta Kurdî-dk di vê armancê da biryardar e û divêt civata Kurd jî xwudanîyeke mezin û xurt li vê bizavê û prosesê bike û piştevanê Înstîtuta Kurdî-dk be.

Di vê resepsiyonê û pîrozbahîya Cejna Zimanê Kurdî da Înstîtuta Kurdî-dk piştî şeş meh kursa Kurdî dê sertîfîkatan bide 17 kursîstan. Em hêvî dikin ev seremonîya sertîfîkatan bibe motîvasyonek ji bo hemû ciwanên Kurd ku li perwerdeya makzimanê xwe Kurdî germ bibin û di hemû baskên jîyana xwe da makzimanê xwe bi kar bînin, heke nizanin jî bi heweseke mezin fêr bin. Em bangî hemû daybabên Kurd dikin ku digel zarokên xwe bi zimanê xwe biaxivin û ji bo pêşkevtina zimanê wan jî rêbikine kurs û perwerdeya Kurdî ya Înstîtuta Kurdî-dk. Payîzê kurs dîsa ve dest pê dikin û hêj ji nihe ve xwe li kursên Înstîtuta Kurdî-dk binivîsin.

Di dawîyê da spasî Dr. Ibrahîm Seydo, mamostayê Kurdolojîyê li Unîversîteya Sorbonê, INALCOyê li Parîsê, serokê Instîtuta Kurdî-Zazakî li Berlînê Lerzan Jandîl, nivîskar û zimanzan Huseyin Kartal, ji rêvebirîya Instîtuta Kurdî ya Stockholmê Şoreş Reşî dikin ku bi hatina xwe em bi zêdehî ve şa û bextewar kirin. Yêk bi yêk spasî we hemû mêhvanên ezîz dikin.

Bawerîya me seda sed e ku bi hevkarîya we hemûyan Înstîtuta Kurdî-dk dê di kar û xebata xwe da serkevtî be.

Helbet ji bo hevkarîya xurt ya Komisyona Ziman û Perwerdeyê ya KNKê, Fey-Kurd, Sentera Kulturî ya Kurd û Danmarkîyan û Fokus-Ayê jî em gelek spas dikin û ji xwe em dê bi hev ra hêj gelek xebatan bikin.

Û spas.

ROJAN HAZIM

Rêvebirê Giştî yê Înstîtuta Ziman û Perwerdeya Kurdî Li Danmarkê

12 Gulan 2012, København

 

**

Hindek foto ji resepsiyonê :